.. السلام عليكم ورحمة الله وبركاته ..


بونسيرا بونسيرا
(يعني أهلا أهلا بالايطالي)


من فترة وانا اجرب كذا طريقة للزانيا ابا اوصل لنفس حقت بيتزاهت
وصرت اضيف واحذف واغير لين وصلت أمس للطعم الي أبغاااااه


* الي يبغا يوصل لنفس النتيجة يطبق الوصفة بحذافيرها
لايغير مقادير ولا كمية




1- الصلصة:


نقلب بصلة في زيت ولمن تبدء تذبل نضيف نص كيلو لحم مفروم ونخليه يستوي مانضيف عليها أي ملح او بهار عدا رشة فلفل اسود




بعد كدا نجهز الصلصة:
نقلب بصلة مفرومة في زيت ونضيف عليها حبة جزر مقطعة صغير جداجدا وعود كرفس كامل (ساق واوراق) ونقطعه صغير جدا جدا
نقلبهم مزبوط لين يذبلوا
بعد كدا نضيف 2 ك طماطم مقطعة صغير بدون مويتها وبذورها
+2 فص ثوم شرايح + 2علبة معجون طماطم+3:4 ورقات ريحان
(اذا بتسبدليه بريحان ناشف حطي رشة بسيطة جدا)
+2ورق غار +مكعب ماجي+رشة بسيطة ملح
+رشة بسيطة بهار ايطالي او اوريغانو (اذا ماعندك مو مشكلة)
بعد كدا نضيف اللحم ونخليهم على نار هاااادية جدا جدا

انا استعمل اصغر عين في الغاز واحرك المفتاح كأني حطفيه
فيصير أقل حرارة




ونخليهم على النار فترة طويلة كل ماطولتي كل ماطلع الطعم أحلى
ولمن تستوي نضيف ربع كاسة بقدونس مفروم ونقلب ثم نطفي ونخليها تبرد تماما





2- البشاميل:

نذوب 4 م ك زبدة ونضيف نص كوب طحين ونقلب لين يتغير لونه ويصير ذهبي




بعد كدا نضيف 4 ك حليب لكن بالتدريج ومهمة هادي النقطة عشان لايتكتل ونقلب مزبط بعد كدا نضيف نص مكعب ماجي ورشة بسيطة لاتذكر قرفة (حطيتها بدال جوزة الطيب لان مايجوز استعمالها)
واول مانحس ان البشاميل اتكثف نطفي النار
وهادي طريقة عشان تعرفي انه صار جاهز ولا لأ
تسوي خط على ظهر الملعقة اذا ماساحت الاطراف يعني جاهز




لمن تبرد اللحمة والبشاميل نلخبطهم سوا




3- المكرونة:

نسلق بكيت من مكرونة اللزانيا في ماء وملح وزيت كثيرين
الملح عشان النكهة والزيت عشان لاتلصق
انا اسلقهم في صينية لان المكرونة تكون شرائح طويلة وكدا
اسهل من القدر




4- الريكوتا:

نخلط نص كيلو جبنة ريكوتا مع 2 حبة بيض لين يصيروا كريما
وممكن نستبدل الريكوتا بالجبنة القريش




5- التطبيق:

نحط في قاع الصينية (حجم وسط) مسحة من اللحم او الريكوتا
ثم طبقة من المكرونة وندهنا بخلطة الريكوتا




ثم طبقة من اللحم




ثم نرش موزاريلا من قللب



ونعيد الطبقات حوالي 4 مرات او حسب الكمية الي عندك

اخر طبقة تكون لحمة وعليها موزاريلا + بارميزان كثييير
و2 م ك زبدة



نغطيهم بقصدير ونحطهم في الفرن نص ساعة
وبعد ها نكشف القصدير ربع ساعة

لمن نخرجها من الفرن نخليها تهدا شويا وبعدين نقطعها



وهادا الشكل النهائي
(استعجلت وقطعتها وهي حارة فطاحت على بعض ومابينت الطبقات مزبوط )




وصحتين وصحة

المصحف الالكترونى
حملوه بالله عليكم
http://quran.muslim-web.com




إذاكانت الحياة تقاس بالسعادة....فأكتبوا على قبري ماتت قبل الولادة