علام الولف يا نايـف علامـه
بخيل ٍ في اتصالـه وابسلامـه
في تالي وقتنا أصبـح يجافـي
وأنا ما غير أفكر فـي كلامـه
عسى ما هو زعل مني بكلمـه
أو أنه مستمع هـرج الملامـه
أو أنه عاجبه غيـري أو أنـه
تغلى يـوم زوّدت اهتمامـه !!
نحيل الخصر معسول الشفايف
كحيل العيـن خـده كالغمامـه
طويل القـد متباهـي وزاهـي
يبيّن كل وصـف ٍ بانسجامـه
غيابه من ثمان شهور وأكثـر
وانوح اليا طرى نوح الحمامـه
ابيـك تـروح لـه بالله قـلـه
علام النور غيّبـه ظلامـه !!
علامه مبطي ٍ ما عـاد يسـأل
وانا ما غير مشغلنـي غرامـه
وابيك تقول له عن وصف حالي
عساه يحـن ويحـس بندامـه
هويته والهوى ماهـوب يرحـم
وجسمي ما قوت شيّله عظامـه
يذوق النوم وعيونـي سهيـره
عسـى ربـي يهنيـه بمنامـه
مقامه غالي ٍ ماهوب يرخـص
لو أنه قد نسى باقي احترامـه
ولكـن لا يخلينـي يـا نايـف
يضيع العمر عامه خلف عامـه
طلبتـك لا يوردنـي هلاكـي
حرام أنه حرمنـي الابتسامـه

::::::::::::::::::::::::::::::::::::::::::::::

منقول

:::::::::::::::::::::::::::
(( الجــــــفـــــــا ))